నేను
.
అంతులేని ఆలోచనల ఆకారం నేను ..
అలుపులేని అన్వేషణల చకోరం నేను ..

కార్తీక పున్నమి లో వెన్నెల శీతలం నేను ..
మేఘబంధం లో మెరుపుల ఉష్ణం నేను ..

ఆనందపు ఆర్ద్రతలో ఆదమరచి నిదురించిన సత్యం నేను ..
ఆవేదనల ఉధృతి లో ఘనీభవించిన కన్నీటి స్వప్నం నేను..

వెన్నెల వర్షం లో మత్తుగా తూగుతున్న కలను నేను ..
మంచు వర్షపు చినుకుల మాటున మండుతున్న జ్వాలను నేను

వేయి పౌర్ణమిల వెలుగు నేను .. కోటి తారల తళుకు నేను
విశ్వాంతరాళపు నిశీధిలో వేకువలో వెలగలేని చీకటి చిత్రం నేను ..

చలించే కాలాన్ని నేను .. జ్వలించే వేగాన్ని నేను..
ఆనందపు అధ్బుతం నేను .. ఆశ్చర్యపు అనుభూతి నేను..
పూర్వపరముల నిమిత్తం లేని అపూర్వం నేను .. అనంతం నేను

కర్మ ఫలము తెలిసిన సందేశం నేను..
జగతి మర్మమెరుగని సందేహం నేను..

.

_____సమస్తం నేను .. సమాప్తం నేను____